Monday, June 01, 2015

അല്ലെങ്കില്‍

കാട് തുടങ്ങുന്നതിന്റെ
അതിര്‍ത്തിയിലൊരിടത്തെ
വിദൂരഗ്രാമങ്ങളിലൊന്നില്‍
വൈദ്യുതിയെത്തിക്കാനുള്ള
സന്നദ്ധപ്രവര്‍ത്തനത്തിന്
ഇറങ്ങിത്തിരിച്ചൊരാളാണ്
നിങ്ങള്‍

അല്ലെങ്കില്‍
തന്റെ അലച്ചിലുകളുടെ
ക്ഷീണങ്ങളിലൊന്നില്‍
വഴിയരികില്‍ കാറ്റിലാടുന്ന
കണ്ണാന്തളിപ്പൂക്കളെ
നോക്കിനിന്നപ്പോള്‍
നഗരത്തിലെ
ത്രസിപ്പിക്കുന്ന ഏകാന്തതയുടെ
നാഡിമിടിപ്പിനെപ്പോലെയൊന്നിനെ
അയാള്‍ക്ക്
ഓര്‍മ്മ വന്ന
ആ നിമിഷമാണ്
നിങ്ങള്‍

നോക്കൂ,
നിങ്ങള്‍ വേറൊരാളാണ്
വേറൊരു ജീവിയാണ്
വേറൊരു സ്ഥലമാണ്
വേറൊരു വികാരമാണ്
എന്നൊക്കെ പറയുന്നതിന് പകരം
നിങ്ങള്‍ ഒരു നിമിഷമാണ്,
സന്ദര്‍ഭമാണ് എന്നൊക്കെ
പറയുകയാണിവിടെ

നിങ്ങള്‍ ഇതൊന്നും
വിശ്വസിക്കാനോ
അംഗീകരിക്കാണോ പോകുന്നില്ലെന്ന്
നിങ്ങളെക്കാളും നന്നായി
എനിക്കറിയാം,
ഞാന്‍ തര്‍ക്കിക്കുന്നില്ല

ഇതൊന്നും ഇങ്ങനെയൊന്നും
അല്ലെങ്കില്‍ത്തന്നെയും
പ്രത്യേകിച്ചൊന്നുമില്ലല്ലോ അല്ലേ ?

1 comment:

utto pian said...

ഇടത്തില്‍ നിന്ന് കാലത്തിലേക്ക് പറിച്ചുനടുന്നു എന്നതിനപ്പുറം ?